Nel so artículu “J'accuse...!”, Émile Zola posicionábase (de forma nada tebia) nel gran debate de la Francia de la so dómina: el casu Dreyfus, nel que se condergara falsamente por traición a un capitán xudíu del exércitu. Yera’l 13 de xineru de 1898. Daquella Zola yera seique’l novelista francés más célebre y taba nel cumal d’una sociedá que daba a los escritores un escomanáu capital social.  Sicasí, Zola consideraba que’l so “deber yera falar” y nun “ser cómplice” y, asina, dicía: “Les mios nueches taríen enllenes de vergoña pola pantasma d'un inocente qu’expía allá, na más tarrecible de les tortures, un crime que nun cometió”. 

BACK FREEDAY. Olvídate de mercachifles. Dona lo que puedas y formarás parte de la comunidad de CTXT un año. Desde 10 euros.

¿Cuálu ye’l deber d’una persona sensible a la realidá asturiana y que posee la ferramienta necesario p’articular les sos idees, énte la descargadura constante d’artículos perversos, inorantes o mendaces qu’espubliza estos díes la prensa rexonal y nacional sobre la oficialidá del asturianu? Piénsolo anguaño, depués de qu’un diariu dixital fundáu por un periodista con nome de perru me propunxera escribir una “tribuna” a favor de la oficialidá.

El problema ye qu’esta tribuna apaecería a la vera d’otra contraria a la oficialidá. Tuvi tentáu d’aceptar, la verdá, mesmo pola idea de compromisu políticu que Zola representa que poles mios zunes personales (soi un poco attention whore). Pero depués entamé a imaxinar qué tipu de persona tendría del otru lláu de la páxina: ¿un lexicólogu de la RAE qu’una vegada se bañó na sablera de San Antolín? ¿Una nostálxica del tardofranquismu que tien familia nun pueblu de Cabranes? ¿Un padre de familia que tevo fuxir d'Ourense porque llamaben pan al pan y viño al viño?

Por siguir utilizando la terminoloxía woke que tanto-yos esmolez a los “neorrancios” –como dicen Begoña Gómez y Noelia Ramírez d'Amiga date cuenta– nun sé hasta qué puntu nun sedría yo una especie de tokenasturianista, esto ye, una figura que cola so presencia nun ámbitu (non col so discursu) xustificaría les posiciones estremes, retrógrades y autoritaries d’otros actores na polémica. Nun sedría una oportunidá real de conversar, sinón una posibilidá pa blanquiar el so discursu de noxu. Obviamente, sé que lo que yo diga nun tien tanta importancia –¡y que nun soi Zola!– pero nun quiero facer parte d’un xuegu que va escontra los mios principios y idees.

Por eso dixi que nun quería escribir la “tribuna” del diariu español. Toi a favor del debate, poques gracies. Y como Santiago Gerchunoff nel ensayu Ironía on, toi tamién a favor de la conversación pública de mases que constituyen los discutinios que tienen llugar al traviés de Twitter o de cualesquier otra rede social. Sicasí, nun sé hasta qué puntu cuestionar los drechos básicos de les persones (como’l drechu de les ciudadanes a espresase na so llingua materna, o’l drechu de los roxos a que nun los fusilen los morenos) ye un verdaderu debate.

Considero, como David Guardado na columna qu’apaeció de recién n'Asturies.com, que más qu’un debate supuestamente democráticu (como mos vienden los que nunca nun tuvienon interés dalu na democracia) ye una manera de matar al muertu. El llingüista John L. Austin falaba en 1962, nel so llibru Cómo facer coses con palabres, d’enunciaos performativos, ye dicir, enunciaos que pol fechu de ser pronunciaos en voz alto aspiren a producir aquello qu’enuncien: por exemplu, “Declárovos maríu y muyer”, “Queda inauguráu esti banzáu” o “L'asturianu ye una llingua muerta”. En resume: les coses que quieren facer coles palabres los contrarios a la oficialidá arrecienden a muerte.

Pero amigues, esti muertu ta mui vivu. O como diz el títulu de la película de Zemeckis, a l'asturianu la muerte siénta-y perbién. Cuido que la mayoría social que ye favoratible a la oficialidá ye una bona noticia pal futuru del asturianu, y que tenemos motivos pa ser optimistes. Agora ye responsabilidá de la xente sensible y bravo d’esti país midir les sos palabres y saber qué quieren facer con elles. La pantasma de la llingua asturiana ha persiguimos si, como sociedá, nun somos quien a defender los drechos llingüísticos de nueso. 

Con Émile Zola, podemos dicir que, sinón, Asturies tendrá sobre’l rostru esta baxeza y la historia escribirá que foi nesta época que crime social talu pudo cometese. Poro, prestaríame animar a aquelles que sientan qu’esti pueda ser el so deber a falar agora, porque nunca nun tuviemos tan cerca y esti ye’l momentu. 

Otra manera, voi poner el ramu a esti artículu coles palabres coles que Zola zarra’l de so: “En cuantes a les persones qu’acuso, nun les conozo, son namás entidaes, espíritus del mal social. Y l’actu que toi realizando ye namás un mediu revolucionariu pa acelerar la esplosión de la verdá y la xusticia”. 

---------------

Xaime Martínez (Uviéu, 1993) ye escritor y músicu, Premio Nacional de Poesía Joven “Miguel Hernández” 2019. Ta acabante publicar la novela La fuercia o les cuatro epifaníes de Martín Feito.